- 399 -

1403. Juli 2. Liegnitz.

In gotis namen amen. Wir hernochgeschreben Georgius Cloptaw vnd Symon von Wirbin, schaffer der vicarien vff deme thume czu Legnicz bekennen von vnser vnd aller der selben vicarien wegen, das vor vns komen ist der erbir man Hannes Peyskernenne gesunt vnd vornumftig vnd hot vmbetwungen vnd Vmbetrogen rechtlich vnd redelich gegeben vnd vff gelosen der erbarn frawen Margarethen Questenerynne seyner elichen hawsfrawen seyn haws vnd hoff, teych, vnd garten in allen reynen vnd greniczen, als her is gehobit hot vnd besessin vor dem Glogischen tore czu Legnicz in sulcher mose, das her seyn mit er gewaldig wil seyn, dy wyle her lebit, noch seyme tode, is das se en obirlebit, so sal is er seyn czu thun vnd czu losen, wy ir das behagit aller beste, das selbe obgen. erbe leyhen wir auch vnd reychens der obgenantin frawen Margarethen in aller moze, also oben stet geschreben; des czu ewiger sicherheyt haben wir vnser vicarien ingesegil an desen briff gehangen czu Legnicz noch Cristi geburth vnsers liben hirren in dem dritten vnd virczenhundirczten iare an vnser liben frawen tage der besuchunge sente Elyzabeth.

Concept. Königl. Bibl. zu Berlin. Ms. Boruss. f. 569 No. 83.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866